 الإثنين 07 مارس 2011, 17:23 | المشاركة رقم: #1 | |||||||||||||||||||||||||||||||||||||
|  موضوع: خلاص بقيت اخت خلاص بقيت اخت   طفقت احدث نفســـي احدثها فأقول .... فاكرة الأيام دي ؟؟؟؟؟ أول ما لبستي حجاب شرعي سليم ؟؟؟؟ و الناس كلها بقت بتقولك يا أخت فلانة و بقيتى لما تشوفي واحدة متبرجة بتروحي تكلميها ؟؟؟ و لما تلاقي سواق الميكروباص مشغل أغاني تديله شريط قرآن أو درس دينى ؟؟؟؟ لما كنتى بتمشي في الشارع وكتاب طلب العلم في شنطتك وماشية للمسجد وكأنك رايحة للجنة ؟؟؟؟ و لما كنتِى بتسجدي و تقعدي تتكلمي مع ربنا و تحكيله على كل اللي مزعلك و تشتكيله ؟؟؟ فاكرة المشاعر اللي كنتى بتحسي بيها أيامها ..؟؟ كنتى بتحسي إنك طايرة من الفرحة .. و إن الحياة كلها منورة .. وإنتى ماشية في الشارع حاسة إن الشوارع و العمارات بتضحك و الدنيا فعلا شكلها اتغير...!!! حتى لما تحصلِك مشاكل لما كنتى بتقعدي وسط أصحابك وتلقيهم بينموا وتنصحيهم بيزعقولك ويقولولك ( وهو فيه إيه يعني دي شوية فضفضة ) كنتى بتسيبيهم و انتى زعلانة على حالهم ولكن كنتى بتبقي فرحانة إنك سبتي شيء لله و لما كانت بتحصلِك مشاكل في البيت و خناقات .. أول ما المشكلة تعدي كنتِ بتحمدي ربنا و بتفرحي جدا و تحسي إنك نجحتي في الابتلاء فاكرة المشاعر دي؟؟؟؟؟ لما كنتى كل ماتعرفي حاجة جديدة في الدين بتحاولي انكِ تنفذيها فورا من غير ماتسألي ده واجب و لا مستحب لما قعدتي تتدربي مع نفسكِ في البيت عشان تعرفي تقعدي جلسة التورك في الصلاة و لما كنتى كل ما تيجي تشربى حاجة تدوّري على حتة تقعدي فيها عشان تشربي وانتي قاعدة على السنة فاكرة المشاعر دي؟؟؟؟ (مشاعر البداية) ؟؟؟ أمال إيه اللي حصل بعد كده ؟؟؟ كنتي في الأول بتستغربى من كلمة يا أخت و الكلام ده و تقولي أنا لسه ما وصلتش للحاجات دي دلوقتي اتعودتي على الكلمة دي .. و لما حد بيقول يا أخت (حتى لو مايقصدكيش انتِ) بتبصي فاكراه بينادي عليكى دلوقتى سمعتي شرايط كتير و حضرتي شوية دروس و بدأتى تصدقِى إنك أخت بجد و الناس بقت بتسألك في الدين و انتى بقيتى بتفتي و بقيتى تقولي الشيخ فلان ده مبتدع و الشيخ فلان ده ربنا يهديه و بقيتى تقولي : أصل ده مستحب لا ده مش حرام ده مكروه لا أصلك مش فاهمة.. ده في مواضع تجوز فيها الغيبة و بعد كده بدأتي تتخِلّى عن حاجات كتير كنتى بتعمِليها و تقولي أصلها مستحبة و المرحلة اللي بعدها رجعتي لشوية معاصي و بقيتى تنامى عن صلوات و... و.. و... ... بس برضه ..أنا لسه ( ملتزمة )فاكرة مشاعرك في الفترة دي ؟؟؟ مشاعر !!!... مشاعر إيه ؟؟؟؟؟ مابقاش فيه مشاعر خلاص أنا بقيت لما أسمع درس في الرقائق أقول الحاجات دي كلها أنا عارفاها و سمعتها قبل كده أنا عديت المرحلة دي و الصلاة خلاص اتعودت عليها و مابقتش باحس فيها بأي حاجة مابقاش فيه أي مشاعر فييييين أيام زمان ..؟؟ طيب أمال المشاعر الحلوة بتاعة زمان دي راحت فين ؟؟؟ أنا هقولك مشكلِتك إنِك عشتي الوهم كذبتي كذبة كبييييرة و صدقتيها الكذبة دي هي كذبة بس استنى بس و ماتقعديش تقوليلي لا ياستي انا لا أخت ولا حاجة ده أنا غلبانة و كلي ذنوب دي الكذبة التانية إنكِ حتى مع نفسِك من غير ماحد يبقى معاكِى بتكدبي و تقولي إنكِ شايفة نفسك ولا حاجة و إنتِى من جواكِى شايفة نفسك حااااااااااجة كبيييرة جداااااا بس المصيبة إنك مش عارفة كده مش عارفة إنك شايفة نفسك موضوع معقد مش كده ؟؟ بس هي دي الحقيقة شيخ الإسلام كان في عصره فيه شبهات كتير و كان هو بيتصدى لكل الشبهات دي و له كتب كتير في الرد على المبتدعة بس شوفي الكلمة دي كان بيقعد بعد صلاة الفجر في المسجد حتى يتعالى النهار يعني لحد الظهر و يقول: (هذه غدوتي لو لم اتغدى هذه الغدوة لسقطت قواي) و العلماء بيقولوا إن الكلام في الرجال و الرد على أهل البدع لو ماكانش صاحبه ليه حال مع ربنا يقسي القلب عرفتِى ليه المشاعر راحت ؟؟ قال الإمام الذهبي (الكلام في الرجال لا يجوز إلا لتام المعرفة تام الورع) يعني مش إنتِ خااااااااااالص إنتِ تسكتي و تبصى لحالك إنتِ إيه حالِك مع ربنا إيه حالِك في صيام النوافل و قيام الليل و الدعوة إلى الله؟؟؟؟ إنتِ صدّقتي إنك أخت بجد ولا إيه ؟!!! لا فووووقي فوقي و حاولي تلحقي نفسِك قبل فوات الأوان طيب أنا أعمل إيه دلوقتى عشان أرجّع الأيام دي تاني لازم أول حاجة تلجأى لربنا خليكِ قدّام الباب و ألحّي في الدعاء إنه يخلِصك من اللي انتِ وصلتيله ده ابعدِى نفسك عن أي مجال للجدال و الكلام عن أي حد مش موجود... سواء مشايخ أو غيره حتى لو مخالفين للمنهج السلفي و لو يعني اتزنقتِى و انتِ مثلا بتدعو حد و بتكلميه مثلا عن الأغاني و قال لِك أصل الشيخ فلان قال.. تقوليله إن كل إنسان ممكن يغلط و مادام الأمر فيه نَص من القرآن و السنّة يبقى ماينفعش نقدّم كلام أي حد على كلام ربنا و كلام الرسول صلى الله عليه و سلم ...وكده بس إوعي تغلطِى في الشيخ اللي قاللتلك عليه... و والله ده هيعليكِى عند اللي قدامك لازم يبقى ليكي حال مع ربنا و ليكي ورد من العبادات تحاسبِى نفسك عليه باختصار .... لازم تقفي مع نفسِك وقفة محاسبة... لازم تشوفي يومك اللي انتِ بتقضيه ده يوم واحدة ملتزمة ولا لأ !!!!! أسأل الله أن يجعلنى وإياكم من أهل القرآن الذين هم أهله وخاصته اللهم لا تجعلنا ممن ضلّ سعيهم فى الحياة الدنيا وهم يحسبون أنهم يحسنون صنعا.... لا تنسِ تجديد نية استخدام الانترنت الدعوة الي الله التى هى وظيفة الأنبياء الصحبة الصالحة الأخوة في الله حضور مجالس العلم وطلب العلم النافع نفسك إن لم تشغلها بالحق شغلتك بالباطل شكر نعمة الانترنت بإستخدامها فيما يرضي الله وتعاونوا علي البر والتقوي الترويح عن النفس فيما يُرضى الله كثرة سواد المسلمين معرفة اخبارالمسلمين نصرة للرسول صلي الله عليه وسلم كلمات اعجبتنى .. بتصرف ؛؛ اسال الله ان يثبتنا على دينه وان يتقبل منا ومنكم صالح الاعمال 
| |||||||||||||||||||||||||||||||||||||
 | ||||||||||||||||||||||||||||||||||||||
| الإشارات المرجعية |
| مواضيع ذات صلة | |
|
